يا الخضرا | | لطفي بوشناق | | Lotfi Bouchnak

الصفحة الرسمية للفنان لُطفي بوشناق على الـ Facebook https://m.facebook.com/Lotfi.Bouchnak.Official/ Subscribe to Lotfi Bouchnak YouTube Channel يا الخَضْرَا أنا مجنونك يا بلادي أنا مجنونِكْ حايِرْ بِينْ عقلِكْ وجْنُونِكْ مِتْزِيلِفْ والرّيح شْهيلِي دسِّينِي يالَلَّا في شُونِكْ... * وانا آشِ مْذَوّقْنِي المُرَّة غير البعض مْنِ امّالِيكْ؟ آنا حُرّ وْإِنْتِ حُرَّة وْهُمَّ يْبِيعُو فيّ وفِيكْ سرْقُوا الزّيتْ وسرْقُوا الجَرَّة وسرْقُوا الوَرْد عْلى خُدّيكْ وسرْقُوا الخِيط اللّي في الصُّرَّة وضحْكُوا عْلَيَّ وضحْكُوا عليكْ... وانتِ اللِّي مُشْ بَايِنْ لُونِكْ ما اطْوَلْ صَبْرِكْ عَلى اللِّي يْخُونِكْ مَرَّة عْسَلْ مَرَّة عَلْقَم مَرَّة تْبُوسْ مَرَّة تِقْدِمْ قُولِي لِي بجَاه الله شْكُونِكْ؟ * وانا آشِ مْقَطَّعْنِي الوَادْ وآشِ مْدَخَّلْنِي بْحُور غْرِيقَة وآشِ مْحَرَّقْنِي لِلابْعَادْ لو مَا شعْلِتْ فِيَّ حْرِيقَة نحْلِفْ لو كُنْتِ مِيعَادْ ما نْوَخَّرْشِ عليك دْقِيقَة نرْقُصْ تَا نْوَقّظْ لاَعْيَادْ وِنْغَنِّي شْمَاتَة في الضِّيقَة وِانْتِ اللِّي مُشْ بَايِنْ لُونِكْ ما اطْوَلْ صَبْرِكْ عَلى اللِّي يْخُونِكْ مَرَّة دَمْ مَرَّة حنَّة مَرَّة نار مَرَّة جَنَّة قُولِي لِي بْجَاه الله شْكُونِكْ؟ * وانَا آش مْعَدّينِي الحافَةْ إلاّ عْلَى أجلك يا غْرامِي قَلْبِي اللِّي جْرَحْتِه تْعافَى وعَلَّمْنِي نُسْمُرْ قُدّامِي نْغَنّي حتى نِمْحِي لِمْسافَة مَا بِين ايّامِك واحْلامِي ونرقُصْ كي طير الخُرّافة مِن الجَمْرِ اللي تحتَ اقْدامِي وانتِ اللي مُش بايِن لُونِك ما اطْوَل صبْرك عَلى اللِّي يْخونك مَرَّة تْشِدّ مَرّة تْسَلِّمْ مَرَّة تْيأسْ مَرَّة تِحْلِمْ قُولِي لِي بْجَاه الله شْكُونِكْ؟ * ثَمَّة بْلاد تْقُول وْسَادَة تْرَضَّعْ وِتْنَاغِي وِتْحَمِّلْ وثَمَّة لِبْلاد الوَلاَّدَة وثَمَّة اللِّي تُولِدْ وِتْهَملْ وانَا نْحِبّكْ حُبّ عْبَادَة مهما في حُبِّكْ نتْحَمِّلْ وحتّى لُو تْدَلّلتِ زْيادَة نْعيش حْياتي الكلّ نْدَلّل... وانتِ اللّي مُشْ بايِنْ لُونِكْ ما اطوَلْ صَبْرِكْ على اللِّي يْخُونِكْ مَرَّة كَفّ مَرَّة إشْفَى مَرَّة بْلاَدْ مَرَّة مَنْفَى قُولِي لِي بْجاه الله شْكُونِكْ؟ ألحان و غناء : #لطفي_بوشناق كلمات الشاعر : #آدم_فتحي 🍃

الفئة