ھوشام ءِ شِپادیں دشت ، بلوچی مراگش بام شُبین ۔

ھوشام ءِ شپادیں دشت ءُ عارف وفا نثاریوسف عارف وفا بلوچی لبزانک ءِ پڑ ءٙ شاعر ، آزمانکار ، گدار نویس ، زبان دوست ءُ ادبی جھد کارے ءِ جہت ءٙ زانگ بیت ، گوں وتی جوان ءُ جتائیں درشانداب ءِ سبب ءٙ آئی ءٙ ماں لبزانکی دُنیا ءٙ شعر ءُ ردانک ، ہر دوئیں صنف ءُ تھراں وتی منّارینگ ءِ جھد ءٙ وت ءٙ صوب مند کتگ ، یک رُژنا پگر ءُ دیر اندیشیں ندکارے ءِ جہت ءٙ آئی ءٙ وتی شعر ءُ نبشتانکانی تہا وتی راج ءُ وتی چاگرد ءِ جیڑہ ءُ جنجالانی باز وشیں وڈے ءٙ نمائندگی کتگ عارف وفا سن 1984 , ءٙ ماں میتاپیں مند ءِ روکپتی دمگ ءٙ لبنان نامیں میتگے ءٙ واجہ پیر محمد لوگ ءٙ ودی بیتگ ، آئی ءٙ وتی بنداتی وانگ چہ وتی میتگ بہ زاں لبنان ءٙ دربُرتگ ءُ پہ گیشیں وانگ ءُ زانگ ءِ ھاتر ءٙ آئی ءِ حیال ہمیش اٙت کہ کیچ ءُ شالاں بہ روت بلئے وائے بھت کہ مند ءِ نا گیگیں جاوراں آ موہ نہ دات کہ وتی دیستگیں واباں ماناے دات بہ کنت ، آکبت پہ لاچاری دراں ڈیھی ءِ جوریں قدھے ایربُرت ءُ سرے ماں ڈن ءُ ولائتاں ءُ دِیریں دیاراں کپت ، اے وھد ءٙ ماں امارات عجمان ءٙ وتی سلامتی ءِ رکّینگ ءِ جھد ءٙ گوں وھد ءِ سرد ءُ گرماں جنگ ءٙ اِنت ۔ سنگت ناں یار تہنائی اِنت کنت اِنت ودار تہنائی اِنت عارف وت ءٙ گوں سرگراں دنت اِنت قرار تہنائی اِنت گوں وتی زبان ءٙ ھب ءُ واھگ آئی ءٙ چہ کسانی ءٙ بیتگ بلئے نبشتہ ءِ بنداتے 2001 ءِ دھک ءٙ وتی ھائی اسکول ءِ وانگ ءِ دوران ءٙ کتگ ، آ زمانگ ءٙ بلوچی تاک ءُ مہتاک چوش کہ ماہتاک بلوچی کوئٹہ ، ماہتاک لبزانک حب چوکی ، سوغات ءُ آتار چہ کراچی ءٙ ، وتی ہند ءُ دمگاں ایشانی جہگیری ے ہم کتگ ءُ پریشاں کارے ہم کتگ چوش کہ شعر ءُ نبشتانک ءِ مُچ ءُ یکجاہ کنئگ ، گوں ادب ءُ لبزانک ءٙ وابستگیں مردماں گِند ءُ نند ءُ گُلگدار۔ آ گُشیت من چہ وتی دراہیں سینیئراں دربُرتگ ءُ ھیل گِپتگ ، کُل منی رہ دربر ءُ اُستاد اٙنت بلئے ہما زمانگ ءٙ کہ نمیرانیں گُل محمد وفا مندسورو ءِ ھائی سکول ءٙ اُستادے ءِ جہت ءٙ وتی ذمّہ واریاں پیلو کنئگ ءٙ بیتگ ، منی گیشتر نندءُ نیاد گوں ہمائی ءٙ بیتگ اٙنت چرآئی ءٙ من بازیں چیزے دربُرتگ ، اللّہ ءِ نیکیں رحمتانی ساھگ ءٙ بات ۔ آمین من چونایا مُلّا پازل ءِ سک باز وانوکے آں ، عطاشاد ، جی آر مُلّا ، مراد ساحر ، محمد حُسین عُنقا ،بشیر بیدار , غلام حُسین شوہاز ءُ مبارک قاضی اے کُل منی روحانی رھشون ءِ رہ در براٙنت چریشاں من بازیں چیزے یات گِپتگ ۔ آ، ماں مندبلّو ءٙ قدیرساگر ءُ منصور آزاد ءِ ہمراہی ءٙ قاسم لبزانکی مجلس ءِ بن ھشت ایرکنوکاں ہوار بیتگ گوں ءُ قاسم لبزانکی مجلس ءِ پاگواجہی ءِ اگدہ ءِ سرا اود ءِ لبزانکی جیڑہ ءُ جنجالاں ہوں ہوار ءُ ساڈی بیتگ گوں ، ہروڈیں برنامہ ءُ پروگرامے کہ بیتگ آئی ءٙ پہ نیک نیّتی وتی بھر اوار گیتکگ گوں ، آئی ءِ اے عمل گوں وتی زبان ءُ لبزانک ءٙ آئی ءِ مہر ءُ واھگ ءُ نیک نیّتی ءِ جوزگانی مستریں نشانی اِنت ۔ آ، لُولی داتگیں ، پاساں شموشیت چتو دل مکّہیں ماساں شموشیت نہ اِنت عارف بلوچے کہ بہ زاں آ اے زگریں حون ءِ چکّاساں شموشیت ہوشام ءِ شپادیں دشت آئی ءِ شعرانی نوکتریں کتاب ءِ نام اِنت کہ پنچ سال پیسر بہ زاں 2016 ءٙ چہ کوہ ڈگار لبزانکی مجلس دشت مکسر ءِ نیمگ ءٙ چھاپ ءُ شِنگ بیتگ ، اے کتاب کوہ ڈگارلبزانکی مجلس ءٙ چھاپ ءُ شِنگ کتگ پمشکہ کتاب ءِ توامیں واک ءُ اکتیار گوں ہمائی ءٙ اٙنت ، سرتاک نثاراحمد ءٙ ڈیزائن کتگ ءُ ایشی ءِ کمپوز نگ واجہ بلوچ خان ئیگ اِنت ءُ درستی 128 تاکدیم چاگرد کنت ایشی ءِ تہا اندازہ سد ءُ دہ یا سد ءُ دوازدہ شعر اوارگیجگ بیتگ کہ لچّہ ءُ دستونک ءِ ترز ءُ تکنیک ءٙ نبشتہ کنئگ بیتگ اٙنت ، کتاب ءِ پیشگال صادق راہی ءٙ نبشتہ کتگ عارف وفا ءِ بابت ءٙ وتی حیال ءُ لیکہاں درشان کنان ءٙ نبشتہ کنت کہ " ہوشام ءِ شپادیں دشت عارف وفا ءِ شعرانی نوکتریں کتاب ءِ نام اِنت ، منی ند ءٙ چشیں لبز نیست کہ من عارف وفا ءِ شاعری ءِ سرا تران بہ کناں ، وفا ءِ ریچ ءُ کماھگ وت ھبر کن اٙنت ، بلئے من ءٙ دِہ پہ دِہ نمیرانیں سید ظہورشاہ ہاشمی ءِ یک شعرے گیر کئیت ، آ گشیت " شر بہ سوچ ءُ شر بہ سُچ ، شر سُچگ بے ننگّی اِنت ، بے آسر اِنت ۔ وفا ءِ اِزمکاری ءٙ اگاں ما دل ءِ چمٰاں گوں بہ چاریں تہ وفا شر سُتکگیں انسانے گندگ ءٙ کئیت ، ءُ دگہ یک گپّے مہ کناں ملامت باں آ ایش اِنت کہ عارف وفالبزانکی جنگل ءٙ پکیرے کہ آئی ءِ سینگ پورہ لبزانی امبارے گندگ ءٙ کئیت ، ءُ وفا ءِ تخلیق سازی یا ساچشت کاری ءِ کجام ہم تک ءُ پہناتاں گواز کن ئے گیشتر ترا قوم دوستی ءُ راج پہازی گندگ ءٙ کئیت ، ءُ دومی من اے گپ ءٙ ہچ پیم ءٙ چک ءُ پد نہ باں کہ وفا ءِ شاعری پہ بلوچ ءٙ ، ءُ پہ بلوچ راج ءٙ یک بلاہیں سکینے ءُ پہ زبان ءُ لبزانک ءٙ آئی ءِ نوکیں چھر ءُ شُبین ترکیب ءُ جوڑشت آدینکے ءِ دروشم ءٙ گندگ ءُ سہرا بیت کن اٙنت ، چاگرد ءِ جیڑہ ءُ جنجال آئی ءٙ ہنچو وتی لبزانی رنگ ءُ گوناب داتگ اٙنت کہ ہرکس وتی چیدگ ءٙ دیست کنت ، پہ در ور ءٙ کمے سئیل بہ کن ، کہ " اے درد ءِ پشت ءٙ جگر مئے حون انت نہ بئے تو اِنسان ماں کوپگاں تئیگاں برات ءِ جون اِنت نہ بئے تو انسان یا بیا پدا شل کن واھگ ءِ جمبر سُتکگیں اے دیار تُنیک اِنت مند کستانی دروھگاں بستگ فاضل ءِ یاتگار ، تُنیگ اِنت چد ءُ پیسر ہم من ، شپ ، تہنائی ءِ نام ءٙ عارف وفا ءِ آزمانکانی کتابے ، ءُ شعرانی کتابے مُرگ گیابان ءٙ ایوک اٙنت ءُ یلیں بچّ ءِ نام ءٙ گِدارے چھاپ ءُ شِنگ بیتگ اٙنت ، پمشکہ عارف وفا ءِ بابت ءٙ دگہ گیشتر من ہچّ نہ گُشاں آئی ءِ گُشتگیں ءُ نبشتہ کتگیں تخلیق وت ڈس اّنت کہ آئی ءِ اِزم ءِ پُختگی ءُ نازرکی وتی توانائی ءِ کُجام حدّ ءُ ابیلاں سر اِنت ۔ Title : Hoshaam a shipaden dasht . Writter : Arif wafa . Voice : Nisar yousuf . Presented by Balochi maragish baam shuben . 13, september, 2021 #hoshaam-a-shipadendasht #arif-wafa

الفئة